U Motdur ba 24 Pruh jong u Syiem Tirot Sing Syiem la Teinam ha Laitarted.
Ka lyngkhuh sngi burom ba 190 snem jong u syiem Tirot Sing Syiem la rakhe da ka ba teinam da u mot ba shirynñieng ha Laitarted, Nongthliew, Eastern West Khasi Hills da ka seng Hynniewtrep Youths’ Council, ka ba dei artat ka lyngkhuh snem ba khatwei jong ka seng. La plie paidbah ia u mot teinam da u Dr K M Syiemlieh, Syiem Khynnah ka Hima Nongkhlaw ryngkat bad u Bah Roy Kupar Synrem, President, Hynñiewtrep Youths’ Council, ha ka ba ia don lang ki nongkitkam rangbah ba kynthup ia u Bah Rhembor G Saibon, saiñpyniar lumlang, Donboklang Kharlyngdoh, symbud khlieh rangbah bad Isaac Basaiawmoit, Saiñpyniar, Joplang Kharnaior, Khlieh Rangbah ka jylli Nongthliew jong ka HYC. U kongsan, Dr K M Syiemlieh ha ka jingkren u la iaroh ia ka HYC na ka bynta ka kam ba radbah ban tei ia u mot jong u Syiem Tirot Sing Syiem bad u la kyntu ia ki samla ba kin bud ia ka mynsiem ieitri jong u Syiem Tirot Sing Syiem ha manla ki kam ba dei ban trei ha ka imlang sahlang ban kyntiew ia la ki paradoh parasnam. U Khlieh Rangbah HYC u la pynpaw ka jingsngew nguh ia ki nongialam ba ha shwa, u Bah Peter Lawai bad Robert June Kharjahrin ki ba la prat lynti ia ka seng haduh ba u la ioh lad ban trei borbah na ka bynta ban teinam da u mot ba 24 pruh jong u syiem bakhraw, Tirot Sing Syiem. La pynkup burom ia u kongsan Dr K M Syiemlieh da u Bah Roy Kupar Synrem, Khliegh Rangbah bad Rhembor G Saibon, Saiñpyniar Lumlang bad kumjuh ruh ia u barikor rangbah Raphael Warjri da u Bah Donboklang Kharlyngdoh, symbud khlieh rangbah bad bah Isaac Basaiawmoit, Saiñpyniar. Kiwei kiwei ki barikor jong ka Riti Academy ki kynthup ia u Banteilang Hynñiewta, Returnwell Sutong, bad ki kamar Ialissing Mawrie, Banjop Leo Kharmalki, Ban Mawrie. Ka jingrakhe ka la nang phuh shuh shuh da ka ba la pyllait ia ka kotdur lyngkdop halor ka jingiakhun laitluid jong u Syiem Tirot Sing bad ka kot halor ka Synshar Paidbah Khasi ba la thoh da u Bah Raphael Warjri ha ka ktien phareng ba la jer Khasi Folk Democracy, bad la ioh ruh ki jingrwai byrngia na ki kaitor bad duhalia ba kynthuip ia ka Snow White, Khmih Creative Society, Thunder Cave bad ka kynhun u Akbar Nongdhar.
