Raphael Warjri

Ka sngi rakhe ia ka lyngkhuh snem sngi iap jong u myllung Soso Tham ka long ka ba phuh ba phieng da ka jingdon ryngkat jong u Lat ka jylla, C H Vijayashankar ha ryngkat u Bah Paul Lyngdoh, Myntri Mattithaw bad Deiriti ka sorkar Meghalaya. Ha kane ka sngi la ia don ryngkat ruh ki dkhot jong ka Khasi Authors’ Society, ki kur bad longiing longsem jong u Myllung Soso Tham bad kiwei kiwei ki kynrem lyndan ha ka imlang sahlang. La sdang ia ka jingrakhe da ka ba buh syntiew ha u motdur jong u Soso Tham ha State Central Library ban pyrto burom ia ki kam bakhraw ki ba la shon shab ha ka longbriew manbriew.

 Ka sngi rakhe ha ka 18tarik Nohprah ka dei ka lyngkhuh sngiiap ba phraphew saw, ha ka ba u kongsan Bah C H Vijayashankar Lat ka jylla u la ai jingmut ban pyndonburom kum ia une u riewkhraw ha ka lyngkhuh sngikha khnang ba ka jingim jong u kan phalang bad kyrsiew ia ka pateng longsdien ha ka lawei. U symbud kongsan, Bah Paul Lyngdoh, Myntri Mattithaw bad Deiriti u la pyrto ia ki kam bakhraw bad ka saiñpyrkhat jong u Soso Tham da ka ba u la ia nujor bad ki radbah ka thoh ka tar jong ka pyrthei. U Bah Paul Lyngdoh u la pynkynmaw ba kaei ka ba la kren da u Myllung Soso Tham  “Ngi im ha kiwei ki por, Aiu ngin leh namar ka Ri,”  ka ba la sawa lyngba u President ka Amerika hadien katto katne phew snem, ha ba u ong, Ask not what your country can do for you — ask what you can do for your country.”  ka ba mut ‘Wat ym kylli aiu ka Ri kan leh na ka bynta jongphi- kylli kaei ba phi lah ban leh na ka bynta ka Ri’. ka jingiasnoh jong kine ki sur ki ba na sha jngai ha pyrthei bad ba la jlan da ki phew snem ki sngi ki ia, ka la shon shab ia ka jingiadei ka ba jan ha ka khubor ba sawa satlak pyrthei na u Myllung Soso Tham.  

Ka sur ba jam ba sani ka la sawa na ka jingkren bashongkun da u Bah Shlur Manik Syiem ka ba la ringdur ia ka jingim jong u Myllung Soso Tham bad ia ki kyntien kordor ki ba la phalang lyngba ki sur phawar ha ki kot ba u la thoh. La buddien ia kata da ka jingkren ba shongsbai jong u kher rangbah ka sorkar jylla Bah F R Kharkongor ha ba u la nujor ia u Soso Tham bad ki riewkhraw jong ka pyrthei.

Kum shibynta jong ka jingrakhe la pyllait paidbah ia ka kot "Ki Dak Ki Shin Ka Mynnor"  da I Kong Silbi Passah bad la pynkup burom da ka khusnam ka thoh ka tar ia u bah John Sentar Shangpliang, bam kwai ha dwar U Blei kum ban pyrto bad ithuh ia ki kam bakhraw jongu ba la noh synñiang sha ka thoh ka tar Khasi.

La nang pynphuh pynphieng shuh shuh ia ka sngi khraw jong u Myllung Soso Tham da ki jingrwai bad jingshad na ka kynhun "Light After Dark," ki kaitor ba matlah, Red Orleanders, bad ka jingrwai jong ka kong Aida Wankhar. Ha ba shim kyllum ka jingrakhe ka long ka dak ba la nguh syiem ia ki kam thoh kam tar ba radbah jong u Myllung Soso Tham ba u la noh synñiang ha ka longbriew manbriew shityllup.