Raphael Warjri

Ka Meghalaya Heritage Authority ka dei ka Shlem Iktiar Tyngkai Rikynti ka ba dei ban khmih ia ka dor janai pura jong ki snap ka deiriti salonsar ha ka jylla. Hynrei ka rukom bhah kam ha ka tnat sorkar jylla ka long lymbiang ha ba ka jingsngewthuh jong ki kher ki mer ka sorkar jylla ka long ka ba mala. Ha ba la tohkit na ki khlieh korbar kam ha ka sorkar la sngewthuh ba ka khim ka rukom bate kam ha kane ka liang bad la pynsnoh madei mata khlem tipthuh ia ka jingmut ba pura jong kata ka Shlem Iktiar Tyngkai Rikynti. La iathuh ba ha nongbah la aiti ha ka tnat Roisor ne Korbar Sor na ka bynta ban pyntreikam ia kata ka Shlem ka ba phalang ba ka rikynti ka thew tang ia ki dulir barim (archival documents), ki motteinam (monument) bad paki dulan hyndai (ancient building) ki ba dei ki rikynti ba kynthup kham bun tang ia ki dulir barim, ki motteinam bad paki dulan jong ka Sorkar Bilat bad ki nongkynti (property) jong ki phareng ha ka por ba ki dang synshar tehmraw (colonial regime) ha kane ka thaiñ. Katba sha ki thaiñ nongkyndong pat la bynshet ha ka tnat Mattithaw bad Deiriti (Arts and Culture) namar ba la kynthup ia ki snap ka deiriti kum ki martynrai naduh ki tiarthma (traditional weapons), ki tiartemsur (traditional musical instruments), ki tiartrei (traditional implements), ki nongkynti kordor (artifacts) ki nongra mynnor (antiques) kum ki klong ki skaw, diengshat diengkheiñ, ki mawbynna mawknor, ki mawbah mawshyieng, ki kor shongthait bad kumta ter ter. Kane ka rukom buhti ia ki nongkynti jong ka mynnor ki kdew tang ia kiei kiei ki mar ki mata, ki tiar ki tar, ki jingshna bad ki matti ba paw tylli met (tangible) ki ba lah ban twad ne tba da ka kti bad ba lah ban iohi da ki khmat.

Ha kane ka rukom ym don kano kano ka bhah ban kynthup ñiewkor ia kiei kiei ki ba ym lah ban iohi ne sngew (intangible) kum ki sur phawar, ka ktien ba kren lane kino kino ki syrwet jong ka deiriti tynrai kum ka stadtip stadmaïan mynnor (folk science and technology) sur iawbei, ki parom ki paju, rukom duwai phirat, ka ktien ne ka nia ha ka khan ka bishar, ka kñia ka khriam bad kumta ter ter. Halor kane ka nongrim la sngew dei ban pyrshang tyngkai bad kynshew kum ia Kit ki rikynti ba kordor bad ba kynsai jong ki paidbynriew ha ri Khasi shityllup. Ha kane ka jingpyrshang ka don ka bynta ba la ujor bad bynñiaw da ki ba bun ba lang ha ka imlang sahlang shaphang ka jinglong jingman jong ka ktien Khasi. Ki don ki ba syntan ban kam ba ka ktien Khasi ka dang kyrduh bad don ruh ki ba duriap ha la ka tynrai ba ki kam ba ka ktien Khasi ka pahuh. Ha ka pakhuh markynti jong kine ki rukom pyrkhat la sngew dei ban don ka byrshem ban longpdeng ka saiñjabieng saiñjanor halor ki matti jong ki longshwa manshwa ki ba ïai san ïai mer na ka por sha ka por bad ki ba dang deidur deisur haduh kane ka juk thymmai ba mynta. La donkam ka phangma (vision) ka ba shai bad ba sngur shynna (clarity) na ka bynta ban thew ia ka thong ha ka sohpdung jong ka lawei ba ai jingkyrmen na ka bynta ban san ban mer, ban kiew irat bad rasong ka daw jong ka ktien Khasi.

Na ka por sha ka por ka la ju don ka mirnia, ka tainia, ka thirnia, ka tyrko ha ki lympung bad jylli bapher bapher ha ka ba bunsien la mih ka teinia ka seinia, ka pyninia, ka kynthoh, ka tapnia, ka khyllie nia, ka wohnia, ka wohdong bad hateng hateng ka peiñ kyntien, ka sam kyntien, ka synñiang kyntien na kylleng ki thaiñ ha ryngkat ka syllok ka kyntu kynpham na ka bynta ban tei ia ka bor sngewthuh halor ka ktien Khasi. Na kata ka daw la thaw bad shna na ki thymmei ktien tynrai ban pynmih da ki ktien thymmai na ka shikyntien lane da ka ba synrop lang ha ba ym don ka lad ka lynti ban paw ne tip ia kano kano ka ktien ka ba kit jingmut katkum ka jingdawa jong ka kyntien. Ha kane ka jingpyrshang la mih katto katne ki sengnia ki ba la pynpaw katkum ka jingsngewkhia ia la ka ktien kmie, ka ktien Khasi. Ki don ki jingpynsngew ki ba pyrkhing bad ki don ki jingpynsngew ki ba kylluid. Lada pyrkhing than eh ruh ka jynjar ban pynkhieim ia ka ktien bad lada kylluid than eh ruh ka lah ban lyngkar ka ktien; kumta donkam u sawar ban da dok bad ban thew ban woh sani bha khnang ba kiei kiei baroh kin long ki ba janai pura bad ba kynsai paka.

Barabor ka la don ka jingkam ba don ki ktien Khasi ki ba la shim kylliang na ki ktien ba marjan bad marjngai lyngba ki ryta khamtam da kito ki stadphrang na ki salonsari; katba ki don ruh ki riew shemphang ki ba la snah ha ka pule dangle bad ki ba tip dah ia la ka ktien tynrai ki ba pyrkhat da khongpong ban kam ba kiwei ki paidbynriew na sawdong pud ki lah ban shim kylliang na ka ktien Khasi. Ban ia tapnia halor kane ka phang ba mano ba shim nangno kan ym lam sha kano kano ka mihjubab (result) ban pynskhem katkum ba la pynksan. Kumta ia kiei kiei baroh ki ba la neh ha ka ba pyndonkam ha ka ktien kyllum Khasi, lehse ai ba kin neh khamtam lada ki lah longdoh longsnam ha ka kren ka khana, ha ka thoh ka tar bad ha ka pule dangle. Ki nuksa halor kane lehse lah ban ñiewtang kum ki ktien tarik, dusmon, pudina, salad, bhindi, tin, pin, almari, shamoit, pela, peris,  khulom, kot, sia, ben, dawai, bitor, klat, sikret, synduk, khalki, brut, plok, dro, karai, tupia, sing, spel, klat, dot, kudam, lynten, ketli, skul, sorkar, taksi, phutbol bad kumta ter ter. Ki don ruh ki ktien ba dang dei ban tih bniah bad pynskhem la ki dei ba shim ne ba ai kylliang kum ka ktien hok, pop, sotti, suk, dorbar, kurat, khanshi bad kumta ter ter.