Raphael Warjri

Ka ktien rapkhmat (prefix) ka don katto katne tylli ban kylla ia ka ktien tynrai da kawei pat ka ba syriem ne ka ba pher. Ki don ki ktien ki ba don da kawei pat ka ktien tynrai ka ba thikna bad ki don ruh ki kyntien ki ba donkam ban synrop da kita ki ktien rapkhmat ban ioh ktien thymmai. Ki nuksa jong kum kita ki ktien ki long kumne harum:

Kita ki tienrapkhmat dei ka ktien 'jing' ka ktien ‘nong’ ka ktien ‘pyn’ ka ktien ‘kyn’ ka ktien ka ktien ‘kyr’ ka ktien ‘ba’ ka ktien ‘byn’ ka ktien ‘byr’ ka ktien ‘mar’ ka ktien ‘jyn’  ka ktien ‘lyn’ ka ktien ‘pyr’ ka ktien ‘tyr’ bad kiwei kiwei. Ka ktien ‘jing’ ka dei ka ba  pynkylla noh ïa ka tienkren (verb) sha ka tienpasoh (noun): kum ka nuksa, jing-kieng ha ka jaka ban ong da ka ktien tynrai pyrnon, jing-thiah ha ka jaka ban ong da ka ktien tynrai palong,  jing-duwai ha ka jaka ban ong phirat, jing-ïalang ha ka jaka ban ong dorbar, jingkhang ha ka jaka ban ong ka dwar, jingker ha ka jaka ban ong phrah, kynroh, shahksew, pyrda bad kumta ter ter. Hynrei ki don kiwei pat ki khep ba dei ban pyndonkam ïa ka ktien 'jing' katkum ba ka dawa: kum ka nuksa, jing-dih ka lah ban long kano kano ka kynja ba um- umsoh, umngap, umsnepkor,  umslap bad kumta ter ter.  Ka ktien jingkyrkhu, jingmlien,

Ka ktien ‘pyn’ ka dei ka ba pynkylla noh ia ka tienleh tienjia (verb) sha ka ktien bthah: nuksa pynliem, pynïar, pyndonkam, pynsleh, pynkhuid ter ter. Kum kata ruh lehse ka dei ban don la ka jong ka rukom batai ha ka bynta jingkren. Kata kan shong ha ka iktiar ba dei khmih ia ka ktien ban kdew bad rai ia kaba dawa katkum ba pyndonkam ha ka kren ka khana, ka pule dangle bad ka thoh ka tar.

Kumjuh ruh ka ktien 'nong'  ka ba  wan na ka ktien shnong ka dei ka ba  pynkylla noh ïa ka tienkren sha ka tienpasoh lane  verb sha ka noun: kum ka nuksa, nong-rwai ha ka jaka ban ong kaitor, nong-tem nong-put ha ka jaka ban ong duhalia, nong-dro ne nong-thohdur ha ka jaka ban ong barikor, nong-thohkot ha ka jaka ban ong thohjer thohnam, nong-trei ha ka jaka ban ong shakri bad kumta ter ter. Hynrei ki don kiwei pat ki khep ba dei ban pyndonkam ïa ka ktien 'nong' katkum ba dawa: kum ka nuksa, nongbuh nongthaw dei ba nam ïa U Blei Trai Kynrad ha ka ba  donkam ban pyndonkam da kata, nongduwai ne nongkñia ka ba  lah ban long u lyngdoh ne u sohblei ne u bamon ne u kñi ka kmie ne kino kino ki kynja rangbah ki ba  nang ban dud sabuit ne ki ba  nang ban khan ban khad, ban kñia ban khriam bad kumta ter ter. Ka ktien rapkhmat nong ka lah ban wan na ka ktien shnong ban kylla ia ka tienleh tienjia (verb) sha ka tienmet tienpasoh (noun) khlem da don da kano kano ka shikyntien da ka ktien tynrai, kum nongrep, nongkyndong, nongsor, nongtrei, nongkren bad kumta ter ter.

ka ktien rapkhmat ‘kyn’ ka ba bynrap ha kano kano ka tienleh tienjia (verb) lane ha kano kano ka ktien ka ba don jingmut lane ym don jingmut ban mih da kawei pat ka ktien thymmai, kum ka ktien kynriah, kynran, kynta, kyntu, kynjah, kynthei, kynum, kynthong, kynjai, kynthih, kynjat, kynroi, kynthah, bad kumta ter ter.

Ka ktien rapkhmat ‘kyr’ ka ba bynrap ha kano kano ka kyntien ka ba don jingmut lane ka ba ym don jingmut ban mih da kawei pat ka ktien thymmai, kum ka ktien kyrdem, kyrthai, kyrshah, kyrhuh, kyrtoh, kyrshoiñ, kyrpad bad kumta ter ter.

Ka tienrapkhmat 'ba' ka ba bynrap  ïa ka tienkren (verb) bad tienpasoh (noun) ban pynkylla noh sha ka tienlong (adjective): kum ka nuksa, ba-bha, ba-sngaid, ba-stem, ba-khlaiñ bad kumta ter ter. Hynrei dei ban sngewthuh katkum ba pyndonkam ha ka  synropktien namar 'ba' ka mut ruh ban pynmeh ne pynthaba ne tba jingshai.

Ka ktien rapkhmat ‘byn’ ka ba bynrap ha kano kano ka kyntien ka ba don jingmut lane ka ba ym don jingmut ban mih da kawei pat ka ktien thymmai, kum ka ktien bynta, bynhei, bynthiew, byndi,

Ka ktien rapkhmat ‘byr’ ka ba bynrap ha kano kano ka kyntien ka ba don jingmut lane ka ba ym don jingmut ban mih da kawei pat ka ktien thymmai, kum ka ktien byrngia, byrtem, byrthen, byrhom, byrngut, byrngiang, byrngem, byrta, byrtong,

Ka ktien rapkhmat ‘jyn’ ka ba bynrap ha kano kano ka kyntien ka ba don jingmut lane ka ba ym don jingmut ban mih da kawei pat ka ktien thymmai, kum ka ktien jynjar, jyntah, jyndei, jynthung, jynlat,

Ka ktien rapkhmat ‘lyn’ ka ba bynrap ha kano kano ka kyntien ka ba don jingmut lane ka ba ym don jingmut ban mih da kawei pat ka ktien thymmai, kum ka ktien lynñiar, lyndum, lynthem, lyntang, lynsher

Ka ktien rapkhmat ‘mar’ ka kdew ia kaei kaei ka ba tyngkhuh arbynta kiei kiei lada ka dei ka ba kdup ne ka ba iakhing ruh kum ka ktien mar-biang, mar-kynti, mar-kumjuh, mar-ryngkat, mar-pyrshah. Hynrei dei ban sngewthuh katkum ba pyndonkam ha ka  synropktien namar Ka ktien rapkhmat 'mar' ka mut ruh ki tiar ki tar, ba ju ong ki mar ki mata; ha kawei ka bynta pat ka mut ki radbah ne ramhah kum u Mar Phalyngki; ha kawei pat ka bynta ka mut ba jia ryngkhat, ba ju ong 'mar syn poi u kongsan, baroh ki la ïeng', 'mar ïa rang u slap, la shlei um ha lyngkha'. Kumta dei ban peitthuh bad bishar katkum ka synropktien shwa ban kheiñ ïa kano kano ka kyntien.

Kine ki ba la kdew haneng kum ki tyllong meiktien ki lah ban dei ki ba donkam ban jurip lane ki lah ban long ki ba ym dei than ban shim khia haduh katta katta bad ban tih sani ia kane ka bynta ka dei ha ka jingtbit jong ki stad saiñktien bad ki thohjer thohnam ki ba la pynleit jingmut halor kane ka phang. Lehse dei tang ka ktien rapkhmat ‘ba’,  ‘jing’,  ‘nong’ bad ‘pyn’ ki ba dei ban khmih bniah ha ka rukom pynshong ktien na ka bynta ban mih ki ktien thymmai.