Raphael Warjri

Ka khanatang shaphang jong u Biskorom ka batai shaphang ki khyndai kamar ki khatar kamar kum ki langrut ha ka trei dieng, ka trei dewbyrtha, trei maw bad ka trei nar bad ki kher ki mer ba kham ha khlieh jongki kum ki barikor ki karikor. Ki don ki shruhlamaw jong ki shlem phrang nar, ki shyngoid pdem mar ki ba dang shynna ha shnong rim Rangjyrteh hajan ka shnong Laitduh marjan bad ka Daiñthlen ki ba dei ki rikynti jong ka kam saiñ nar jong ki longshwa manshwa Khasi. Kat ba lah ban sngewthuh ka long ba ki barikor ki dei ki ba khmih ia ka jingtbit ha ka miatdur (aesthetic) bad ki karikor ki ba khmih ia ka jingtbit ha ka korteisani (engineering). Kata ka mut ba ki barikor ki dei ki briew ki ba tbit ha ka miatdur- Artist; bad ki karikor ki dei ki briew ki ba tbit ha ka ba pynkhreh ka pyrshot na ka bynta ban tei sani da ki kor- Engineer. Kata ka mut ba ka ba byrshem ia ka kam ki barikor bad karikor ka thew ia ki riewtbit ba tip ha ka ktien phareng kum ki - Architect. Lehse la dei ban thaw ktien thymmai ia kane ka ktien phareng- Architecture.

Karikor: ka mut ki riewtbit ha ka kam pyrshot na ka bynta ban pynkhreh ia ka thohshruhkot (blueprint) ha ka ba tei ne shna ia ki jingtei ne jingshna- Engineer

Kawang ktieh: ka mut ba thad rong pynbudnam їa kiwei- Mudslinging

Kiewshai: ka mut ba kdew shai ïa kaei kaei ban shynna- Highlight

Kem їongreiñ: ka mut ka por ba lah sep sngi bad khreh dum- Twilight

Kemdum: ha ka por prem miet katba ka jingdum ka sdang paw bad ka jingshai ka sdang jngut la ju ong ba la kemdum. Kumta ha ka kyntien na ka bynta ka kortandur (film/ video camera) ka mut na ba shai la dum suki jai- Fade- out

Kumta ka ba long khongpong ia ka kemdum la jer noh kemshai.

Kemshai: ka mut na ba dum la shai suki jai- Fade- in

Kheng: ka mut ba bei pisa ban khaïi pateng- Enterprise, Invest

Kher ki mer (Ki): ka mut ki kynja riew don kyrdan bapdeng ha ka kam ba ki trei- Officer

Kren kunok: ka mut ba ïathuh lypa ïa ka ban sa jïa hadien- Prophecy

Kumarban: ka mut ka maiñ rangbah u kharlieh- English gentleman 

Kyrtoh lyndet : ka mut phai kylla na lade sha lade- Boomerang

Damdar: ka mut u kynja dhulia kynja sangot  uba phawar bad pynbyrngia ïa ki paidbah ha lympung biria ne ha ka rong ka taw- Compere, Master of Ceremony

Danda: ka mut  ka snap birïa- Comedy

Daron: ha ki katto katne ki jaka, kham tam ha Bhoi ki don ki briew ki ba shna u kum ne khiew dieng bad ka jyntap dieng ka ba don ka tyndong liewtheh na krung ka ba syriem thik kum u ketli (kettle) ka ba mut u kynja kum ne khiew ba don tyndong shyntur ba theh na krung- Kettle

Diengrong: Ha kano kano ka tamasa ne ka rong ka taw ia u kynja dieng tylli ba la kyntiew nam ha kata ka rong ka taw la jer u Diengrong; ka mut u dieng bat nam ha ka lat ba kyrpang- Baton

Diengtiewsaw, u tiewthoiñ bad u latuthiñ- ha thaiñ Shyllong, ka ba kynthup ia ka Hima Khyrim bad Hima Mylliem ia u Diengtiewsaw la ju tip da kiwei pat ki kyrteng ha ki thaiñsepngi kum ha Hima Nongspung, Hima Maharam, Hima Langrin, Hima Nongstoiñ ter ter ki ju khot tiewthoiñ bad don ruh ki ba jer da u latuthiñ- Rhododendron

Dithung: ha thaiñ Pnar ia kano kano ka jingker jingda ka ba pyrshi jingshai lyngba na ka dongmusa la jer da ka Dithung ka ba syriem  kum ka Dingkum (flying lantern) kata ka mut ka kynja jingker ïa ka dongmusa, bad ha ka juk mynta ka dei ka jingker ba pyrshi ia u soh dingshai (electric bulb)- Lampshade

Dongdit, Sawriang: ka mut ka sla pyiar ha sahit ba ïashem ka ryngkew bad ka suiñ- Horizon

Dorkhas: ka mut ka dulir ki mat jingujor ne jingdawa- Memorandum

Eitnairiang: mynnor ki longshwa manshwa ki ju lapdien ia ka kynja dewbyrtha ka ba la man da ka ba khleh ka eit jong ki kynja khñiang ki ba sei artat ia ki phñiang ki ba pnah kat haduh ba ki lah ban pyndambit ia ki maw para maw lane ki lah ban shkah tylli haduh ban da eh kat u maw hi; kata ka ka mut ka khyndew ba shkah bad lah ban dambit bad bat skhem ha ki kynja maw, syrïem kum ka dewbilat- Polymer clay

Jadang: ka mut u tyndong hapdeng u ‘tangkro bad u pdot- Aesophagus

Jylla kharit: ka mut pynryngkang par, Excommunication, Exile

Lang, pali, hali, lyngkha: ki bynta ba phiah ha ka khyndew na ka bynta ka rep ka riang (ka jingkheiñ ka long saw lang ki pynlong kawei ka hali, bad shibun hali ki ki pynlong kawei ka lyngkha, shibun ki pali ki pynlong kawei ka pynthor ne ka pyntha- Cultivation field

Ki khanatang ki don la u saibteng sha ka khnamynnor (history) ki ba iasnoh bad ki jingshisha ki ba lah ban shem ha ka juk mynta. Kine ki jingshisha ki lah ban long ha ka saiñ pyrkhat mynbarim ka ban saiñdur ia ka mynta bad ka lawei lane ki lah ban long ha ka jinglong marmet kum ba lah ban shem ha ka khep ba mynta. Ki rakot ki ramhah, ki ksuid ki khrei, ki purilum puriwah, ki aiñjojo ki boit jathia, ki pukni bhur ki lieng jathang bad kumta ter ter. Ha kajuh ka rukom ki don ruh kita ki sim ba radbah ba la tip kum ki Langtyrkhiah. Katkum ki puriskam ki Langtyrkhiah ki im ha ki rsham bad ha tmier jong ki riat bah bad ki lah ban ksoh da la ki tyrsim ia ki mrad baheh kat ki sniang khlaw ne khla thapsim bad rong sha suiñ da ka ba suk. Ha ba ki kaweh la ki thapniang ka paswut ka lyer la kat ka eriong, hynrei ki per jai jai ha suiñ la kat ka liengsuiñ jong ka juk mynta.

Langtyrkhïah: ka mut ki kynja sim ba radbah- Pheonix

Larmuti: ka mut ki kynja Riewblei ba khuid ba shida- Saint  

Ka maiñ rangbah jong ki briew kynthei ne shynrang ki ba don ka jinglong ka ba shida, ba synlar bad ba ieng skhem ha ka nongrim jong ka hok ka shikyntien bad ki ba ym ju kylla dien trai na la ka jinglong ba iaineh ha la ka rukom pyrkhat, la ju kheiñ ba ka dei ka longrynñieng manrynñieng ba shisha.

Longrynñieng manrynñieng: ka mut ka jinglong akor briew ba shimet- Integrity, Dignity

Ha ba pyniakop bad ka ktien phareng la pynsngew ba ka ktien longbriew manbriew ka thew ia ka jingmut ha ka ktien phareng- mankind. Kumta ka kyntien Longbynbriew manbynbriew pat la pynsngew ba ka thew ia ka jingmut ha ka ktien phareng- Humanity

Longbynbriew manbynbriew: ka mut ka bha ka miat u bynriew- Humanity