Raphael Warjri

Ha ka ktien Khasi lehse ki don sa katto katne ki bynta ba hap ban kynthup ha ka bynta jingkren (part of speech) ki ba dawa na ka bynta ban pynbiang ha ka sohktien (grammar), ki ba lehse ym don snap ha ka ktien phareng ne kiwei kiwei ki ktien. Kita ki long ka ktien kynnoh (binary words), ki ktien shijur (word pair), ktien rapkhmat (prefix) bad ktien synrop (interjoint words). Khlem pat lah ban shem ne tipthuh ba lada ha ka ktien Khasi don ne em ki ktien rapdien (suffix) ha ka ba lada don mano mano ba poiphang ki lah ban synñiang lang.

Lah ban kdew nuksa kawei-pa-pawei na Kit ki ktien kynnoh (binary words), ki ktien shijur (word pair), ktien rapkhmat (prefix) bad ktien synrop (interjoint words) ba la batai hashwa. Ki don ki tynrai kyntien ki ba dei ban shim khia shisha na ka bynta ban tih sani ha ka ba pynjanai pura bad pynlong paka ia ka ktien Khasi katkum ba dawa ki kyntien bad ki don ruh lehse ki bynta ba ym da donkam than ban mushlia lada ym dei ba don ka nongrim ka ba shongnia ban jurip ne tohkit ha ka ba pynwandur ia ki ktien ki ba la don lypa ha ka kren ka khana, ka pule dangle bad ha ka thoh ka tar. Kumta ka dei ka bynta jong ki riewtbit ha ka saiñktien bad ha ka thoh ka tar ban tuklar halor kane ka phang khnang ban janai pura ka ktien Khasi kum ka ktien pdeng ba kongsan ha ka imlang sahlang baroh kawei. Tang katta ruh ym pat biang namar donkam ban jiar shuh shuh lyngba ka iktiar ba dei khmih ia kane ka bynta khnang ban iohlad ban dang tai sani shuh shuh na ka bynta ban kham janai pura nadong shadong haduh ban ym don shuh ban wohnia ne kdewkti da kumwei pat.

Ka ktien kynnoh (binary words) kum ka ktien ‘u tangon u lymban’, ‘ka bha ka miat’, ‘ u jhur u jheb’, ‘u soh u pai’, ‘ka banat ka patu’, ‘ka koit ka khiah’, ‘ka ram ka shah’, ‘u dieng u siej’ ‘u kba u khaw’, ‘u phan u kyrpad’. Dang don shuh ka rukom bhah ktien katkum ki jingkynnoh namar ba don ki ba syriem kum ka bha ka miat, ka koit ka khiah, u soh u pai, u kba u khaw, ka dieng ka siej, paidknup paidtrap; don ki ba iadei katkum ka bynta jong ka ktien nyngkong ha ka ktien ba marbud kum u tangon u lymban, ka banat ka patu, ka bam ka dih, ka rong ka rup, ka rep ka riang, ka thoh ka tar,  ka leit ka wan, ka thiah ka dem, ki kur ki kha, ka ksing ka dhah, khongpong khongdeh, ka jaiñ ka nep, ka thung ka tep, khnong rijied, kper phrah, lynti syngkien, u siej u shken, arti arjat, khnam ryntieh, ka wait ka stieh, ka khoh u star, dohnud dohnam, ka khot ka wer; bad don ki ba khongpong kum ka um ka ding, ka dum ka shai, ka sngi ka miet, pyllup lyndang, ka at ka them, ka shit ka khriat, ka iaid ka ieng, lailum laiwah, ka rngi ka dymmiew, ka liem ka lup.   

Ki don ruh ki ktien kynnoh ki ba bud ryngkhi da ki ktien ba  ym pat peiphang ia ka jingmut jongki ha ka ba lehse ki lah ban don jingmut ba biang pura, kum ki khñiang ki ksiah, ki mrad ki mreng, rangli juki, ilaka singmana, u tnum u tyndai, ka ding ka theh, raieh raidam, pisa pilaiñ, dkhot dkhai, synñiang bynhei, khor khriam, snier snap, byrta shula. Kum kine ki ktien kynnoh ki don ki ba la tip ruh ia ka jingmut jong kito ki ktien ba bud ryngkhi kum ka ktien ka rep ka riang- riang ka dei ba syang symbai ha tyngyier; madan madiah- madiah dei ka thaw baïar palat ka lynter bad kynian bad ba beit ryntih khlem at ne them baroh shi lynter; u khah u nor- nor dei u kynja thied jyrmi ba kham kynrei ha phud wah; ka riat ka ram- ram ka dei ka rsham ba kham padun, u klong u skaw- skaw dei u kynja klong ba kham rit bad sieb na baroh ar tduh.

Ka ktien shijur (word pair): Don arjait kyntien ki ba kajuh ka ktien(identical word) bad ki ba pher ktien (separate word). Ki ba kajuh ka ktien dei kum ka ktien ei ei, teng teng, mian mian, ter ter, suki suki, lap lap, khah khah, lei lei, dar dar, kloi kloi, bak bak, khum khum, jar jar, tiak tiak, doi doi, dik dik, ler ler, laiñ laiñ, khliak khliak, khlir khlir, ram ram; ki ktien ki ba pher ka ba shwa na ka ba hadien dei kum ka ktien huri hura, lap lah, laki laka, luri lura, patung pateng, buk bak, tari tara, luk liak, khim khait, khari khari, khala khala, Kine ki ktien ki don ki ba shikyntien ki don jingmut ha baroh ar kyntien bad don ruh ki ba ym don jingmut ei ei. Ki don ki ba don jingmut ha baroh ar, hynrei ka ba ha shwa ka mut da kumwei bad ka ba bud ka mut da kumwei, katba ka ktien synrop jong kita ar ka mut pat sa da kumwei; nuksa kum ha ka tari tara- tari dei ka tiar ot ba don syrti shiliang, tara dei ka ba pynbiang jur; katba tari tara ka mut pat ban pynkhreh ia kaei kaei. Ka ktien huri hura ka mut ba kulmar, katba huri ha la marwei bad hura ha la marwei kim don jingmut eiei. Kine ki ktien baroh, wat la ki don ar kyntien ha ka shi kynnoh, hynrei la sngewthuh ba ki dei shikyntien; kumta ha ka thoh ka tar donkam ban ieh kumba ka long ne ka dawa ban buh dakïasnoh (hyphen) bad kata ka shong ha ka iktiar ka ba dei ban khmih ia ka ktien Khasi kum ka ktien kren, pule bad thoh.