Raphael Warjri

Ka don ka bynta ha ka ktien Khasi ba ka ba thoh arsynthoh hynrei ka dei pat tang shi kyntien. Kum kita ki ktien ki biang lada thoh ne pule khlem da buh dakpynsnoh (hyphen), hynrei ha ka rukom pynbiang ba salonsar ia ka ktien ha ka thoh ka tar ka dawa ha kano ka rukom, ka shong ha ki stadtbit saiñktien ban pynbiang. Ki ktien ki ba tang shi kyntien ki la don la ka jingmut ba pura hynrei la ju pyndonkam ha ba kren da ka ba ban jur ar ar sien ban kham shon kham jur shuh shuh, kum ka ktien ei ei, lei lei, ter ter, mar mar, teng teng, hateng hateng, moi moi, mian mian, suki suki, lap lap, khah khah, dar dar, kloi kloi, bak bak, khum khum, jar jar, tiak tiak, doi doi, dik dik, ler ler, laiñ laiñ, khari khari, khala khala, khliak khliak, khlir khlir, ram ram, kyndit kyndit, kynsan kynsan, shuh shuh, kdar kdar, khum khum, khleng khleng, khlir khlir, bad kumta ter ter. Kine ki kyntien ba la kdew hashwa ki don ki ktien ki ba don jingmut tang marwei shikynnoh na ka shijur shijur, ki ba lah ban dei ne iahap kum kawei ka kyntien ha ka shijur, hynrei ki don ruh ki ba ym don jingiadei ei ei ruh bad ki phnieng ki jingmut la ka jong lane ki ba ym don jingmut ei ei ha la marwei.

La jan baroh ki kyntien ba la kdew ki don ka jingmut ba antad ha ka jingiadei bad kano kano ka ktien ba bud ryngkhi hashwa ne hadien. Ha ba shim tang kawei ka kyntien na ka shijur ki kit jingmut pat da kumwei ka ba lah ban iadei lane ka ba lah ban pher bak-ly-bak na kaba kynnoh lang shijur. Ka kyntien ei ei ka mut ba antad, katba ka ktien ei ka mut ba ioh khlem da siew; ka ktien lei lei ka mut ba ym da pher than, katba ka ktien lei ka mut ka sboh jyntah ba pyndambit ia ki sla kum ka kot; ka ktien ter ter ka mut ba iai bteng shuh shuh, katba ter ka thew ia ka kynian ne la lynter; ka ktien mar mar ka mut kloi lan khlem pyntud, katba mar ka don ar jingmut, kawei ka dei ia ka tiar ka tar kum ki mar ki mata bad kawei pat ka mut ia kaei kaei ka ba bynta arliang kum mar katjuh ne marbiang ne marshisien ter ter; ka ktien teng teng ka mut tohkhat, katba ka ktien teng ka mut ia ka sur ba sawa na ka ba tied ia ka mar pliang ba stang; ka ktien moi moi ka dei ia ka bynta ha syndah jong ki khmat marjan ka shyllangmat, ka reng ngab bad ka khap shkor, katba moi ym don jingmut ei ei tangba ka ju don ka rukom kren ka ba long synlar ka ba ym da dei eh ka ktien thoh ka ba mut ban doh ieit. Lehse ym da donkam ban da kdew kawei-pa-kawei ka ktien bad la shu sot tang katta kat ban sngewthuh ki ba pule ban duriap halor ki ktien shijur.

Ki don ruh ki ktien ki ba pher ka ba shwa na ka ba hadien dei kum ka ktien huri hura, lap lah, lulu lele, laki laka, luri lura, malu mala, patung pateng, buk bak, tari tara, luk liak, khim khait, jali jaum, khling khlang, khyndiat khynsoit, lymwir lymtham, arti arjat, shiphang arphang, shikit iapar,  kloi lan, byrngem byrsit, kyllai dohdit, kyllaiñ sohsat bad kumta ter ter. Hangne ruh ka ktien ha ka shijur ka don jingmut pura, hynrei lada sot tang marwei shikyntien ka lah ban ym don jingmut ei ei lane ka lah ban phnieng ki jingmut ha la ka jong ka kyntien. Ka ktien huri hura ka mut ba don jingkulmar, hynrei huri ne hura ha la marwei ym don jingmut ei ei; ka ktien lap lah ka mut ba kieh khlem lah shah, hynrei lap ka mut ba shem bad lah ka mut ba long ne jia kumba khmih lynti; ka ktien buk bak ka mut ban pynkloi ia kaei kaei ka ba dei ban leh, katba buk ka mut ba meh kynsan ka ding bad bak ka mut ba pher ban jah syndon jlang; ka ktien kloi lan ka mut ba khluh ban leh thik ha ka por ba kwah ne dawa, katba kloi ka mut ba shwa ban ia kiwei bad lan pat ym don jingmut ei ei; ka ktien khim khait ka mut ba la hiran palat pud haduh ba ym lah leh ei ei shuh, katba khim ka mut ba khapngiah bad khait ka mut ba lut ploiñ. Kumta kiwei kiwei ki ktien ruh ki khleh lang ka rukom sngewthuh ha la ka jingmut lada shijur ne tang shikyntien lane ba ym don jingmut ei ei lada tang marwei. Teng teng ki don ruh ki kyntien ki ba lehse ki lah ban dei ki ktien kynnoh kum ka ktien khyndiat khynsoit, lymwir lymtham, byrngem byrsit, arti arjat tangba ha ba pynshongnia ym sngew iahap ban dei ki ktien kynnoh. Kane ka bynta lehse ka donkam ka jurip sani na ki stadtbit saiñktien ban tai bniah halor kane ka phang.

Kine ki ktien ki dei ki kyntien pynshoh nia shuh shuh lane ban shon jur shuh shuh la ha kaba kren ne ka ba thoh ban kham pura ka rukom kren ne thoh bad lehse lah ban ñiew ba ki dei ha ka thupktien shohktien shonktien (adverb) ha ka rukom jong ka sohktien (grammar) ha ka thoh ka tar Khasi. Lah ruh ban nujor ia ki ktien ki ba lah ban kheiñ ka jingiadei hapdeng ka Tienlong Tiendei (adjective) bad ka Shohktien Shonktien (adverb) ban kham pynjur shuh shuh ia ka jingmut jong ka ktien katkum ka jingkhia jong ka ktien. Kata ka mut ba kum kawei na ki nuksa ba lada ha ka tienlong tiendei (adjective) ‘lap lap’, ka shohktien shonktien (adverb) ka dei ‘lap lah’. Nangta pat ka ktien ‘khah khah’ ka lah ban dei ka tienlong tiendei (adjective) bad ‘khari khari’ ka lah ban dei ka adverb; kum ka nuksa ‘Kane ka briew ka ju wan khah khah katba katai kawei pat ka wan khari khari’. Kawei pat ka nuksa ka long ba don ki ktien ki ba syriem tangba ki pher ka rukom pyndonkam katkum ka synropktien (sentence) kum ka ktien mian mian, jai jai, malu mala kia lah ban kit jingmut kumjuh, hynrei ka rukom pyndonkam ka shong katkum ka khep. Nalor kata ki don ruh ki ktien shijur ki ba dei ki tienmet tienpasoh (noun) kum ka ktien ‘moi moi’, lehse lah ban dang don shuh shuh ka kiwei kiwei de ba khlem pat shem ne kot pyrkhat ban kynthup.